Отец Спиридон Скутис
Не стапувај во брак со некого само затоа што го сожалуваш, ниту само за да си го „средиш животот“, бидејќи годините поминале и се плашиш дека ќе останеш сам.
Многу луѓе доаѓаат кај свештениците со вакви грижи:
„Отче, запознав една девојка. Не ни е баш добро заедно, имаме проблеми, но не е важно — ќе се оженам со неа. Веќе имам 45 години и се плашам дека ќе останам сам, па ќе тргнеме, а како ќе излезе — така“.
Или:
„Отче, во врска сум со едно момче, но имаме сериозни проблеми. Гледам дека годините минуваат и дека е тешко да најдам друг, па си велам да продолжам. На крајот на краиштата, сакам и дете. Ќе му се посветам на детето, а ако не ми биде добро во бракот, некако ќе се снајдам.“
Или:
„Отче, со една девојка сум која многу пострадала во животот. Всушност, ја сожалувам и затоа размислувам да продолжиме кон брак“.
Или:
„Отче, годините ми поминуваат, а времињата се тешки. Јас само сакам да најдам некого за да станам мајка. Се плашам од осаменоста“.
Не стапувај во брак со човек што го сожалуваш. Не стапувај во брак само за да станеш родител, фрлајќи ја сопружничката заедница во отпад. Не стапувај во брак само за да не бидеш сам. Не прифаќај брак од неопходност само за да исполниш некои свои желби и соништа што си ги имал уште од детството.
Не си играј со својата душа, со душата на човекот покрај тебе и со душите на децата што можеби ќе дојдат.
Бракот бара големо внимание, зашто можат да пострадаат и души кои за ништо не се виновни. Бракот не е продавница што ќе ја отвориме, па ако не успее, ќе изгубиме само малку пари и неколку часа од својот живот.
Најди човек со кого заедно ќе се борите да стигнете до Небото. Најди човек со кого ќе се трудите да станете „едно тело“ (1.Мојс. 2,24), а љубовта што ја имате еден кон друг „да не го бара своето“ (1.Кор. 13,5).
Најди човек со кого, во коработ на вашиот живот, кормилото ќе Му го предадете на Христос, а вашата цел ќе биде Царството Небесно.
Нашите избори нека бидат плод на молитва и на стремеж кон рајот, а не само желба пријатно да го поминеме овој краток земен живот. Не се задоволуваме со подземјето — се стремиме кон небесното.
Во бракот сопружниците не се натпреваруваат еден со друг. Тие со љубов ги соединуваат своите слабости и заедно чекорат напред.
Превод од грчки јазик: Свештеник Јани Мулев