Свети Јован Златоуст
Итај кон Бога, Којшто наместо мали нешта, ти предава големи. Но ниту овие издржавме да ги слушнеме и поитавме онаму каде што се случуваат тепачки и борби, и удари и одмазди и клевети. Зарем Бог нема право да нѐ избегнува и да нѐ казнува, кога на сѐ што ни даде ни се дава и Себеси, а ние се противиме? Ова на сите им е јасно. Бидејќи, ако сакаш да се украсуваш, украсувај се со мојот украс (1.Кор. 15,53); ако сакаш да се вооружуваш, вооружи се со моето оружје (Рим. 13,12); ако сакаш да се облекуваш, облечи се со моето облекло (Гал. 3,37); ако сакаш да се храниш, јади од мојата трпеза (Јован 6,51); ако сакаш да чекориш, следи го Мојот пат (Јован 14,6); ако сакаш да наследуваш, наследи го Моето наследство (Мат. 5,5); ако сакаш да влезеш во татковината, влези во градот чиј што уметник и градител сум Јас (Евр. 11,10). Бидејќи Јас за она што го давам не барам награда. Што би можело да биде поголемо од оваа дарежливост? „Јас сум татко, Јас сум брат, Јас сум младоженец, Јас сум дом, Јас сум храна, Јас сум облека, Јас сум корен, Јас сум основа, што и да сакаш сум ти Јас, од ништо нема да имаш потреба… Јас и ќе ти послужам, зашто дојдов да служам, а не да Ми служат! (Мат. 20,28) Јас сум пријател (Јован 15,14), и член на телото (1.Кор. 12,27) и глава (1.Кор. 11,3), и брат и сестра и мајка (Мат. 12,50), сѐ сум Јас, доволно е да си пријателски настроен кон Мене. Станав сиромав заради тебе; станав просјак заради тебе; се искачив на Крстот заради тебе; бев погребан заради тебе; горе на небесата заради тебе Го молам Отецот; долу на земјата бев испратен од Отецот како Посредник заради тебе; сѐ преку Мене си ти; и брат и сонаследник и пријател и член на телото. Што сакаш повеќе? Зошто бегаш од Оној Кој те љуби? Зошто се мачиш за светот? Зошто налеваш вода во дупнат сад? Бидејќи тоа значи да се преморуваш во овој живот. Зошто го чешлаш огнот? Зошто удираш во воздухот? Зошто трчаш неправедно? Секоја вештина зарем нема и една цел? И кај секого е јасна целта. Покажи ми ја и ти целта на твоето учење на земјава. Не можеш, бидејќи „суета над суетите, сѐ е суета“ (Проп. 1,2).
Превод од грчки јазик: Свештеник Јани Мулев